John 10

Umalusi Lomhlambi Wakhe

1“Ngikhuluma iqiniso ukuthi umuntu ongangeni ngesango esibayeni sezimvu, kodwa akhwele kwenye indawo, ulisela lomphangi. 2Umuntu ongena ngesango nguye umalusi wezimvu. 3Umlindi uyamvulela isango, lezimvu ziyalilalela ilizwi lakhe. Izimvu zakhe uzibiza ngamabizo azikhokhele. 4Esezivulele zonke ezakhe, uhamba phambi kwazo, izimvu zakhe zimlandele ngokuba ziyalazi ilizwi lakhe.

5Kodwa kazisoze zilandele owemzini; iqiniso yikuthi zizambalekela ngokuba kazilazi ilizwi lowemzini.” 6UJesu wasebenzisa umzekeliso lo kodwa kabakuzwisisanga lokho ayebatshela khona.

7Ngakho uJesu waphinda wathi, “Ngilitshela iqiniso ukuthi mina ngiyilo isango lezimvu.

8Bonke asebake beza ngaphambilini kwami babe ngamasela labaphangi, kodwa izimvu kazibalalelanga. 9Mina ngiyilo isango; loba ngubani ongena ngami uzasindiswa. Uzangena, aphume, afumane idlelo. 10Isela lilanda ukweba lokubulala lokubhubhisa kuphela; mina ngilande ukuze zibe lokuphila, zibe lakho ngokugcweleyo.

11“Ngingumalusi olungileyo. Umalusi olungileyo unikela ukuphila kwakhe izimvu zakhe.

12Oqatshiweyo kasuye umalusi ongumnini wezimvu. Yikho nxa ebona iganyana lisiza, uyazitshiya izimvu abaleke. Iganyana libe seliwuhlasela umhlambi liwuhlakaze. 13Umuntu lo ubaleka ngokuba eyisiqatshwa, kazikhathaleli izimvu.

14“Mina ngingumalusi olungileyo; ngiyazazi izimvu zami, njalo lezimvu zami ziyangazi –

15njengoba uBaba engazi mina lami ngiyamazi uBaba – nginikela ukuphila kwami ezimvini zami.

16Ngilazo ezinye izimvu ezingasizo zalo umhlambi. Lazo ngimele ngizilethe. Lazo futhi zizalilalela ilizwi lami, ukuze kube lomhlambi owodwa lomalusi oyedwa. 17Isizatho sokuba uBaba angithande yikuthi ngiyayinikela impilo yami – ngizaphinde ngiyithathe. 18Kakho ongithathela yona kodwa ngiyinikela ngokufisa kwami. Ngilalo ilungelo lokuyinikela lelungelo lokuphinde ngiyithathe. Umlayo lo ngawamukela uvela kuBaba.”

19Amazwi aphinda enza abaJuda badabukana.

20Abanengi kubo bathi, “Uledimoni, njalo uyawumana okobuhlanya. Limlalelelani?”

21Kodwa abanye bathi, “La kayisiwo mazwi omuntu oledimoni. Idimoni lingawavula njani amehlo esiphofu?”

Ukungakholwa KwabaJuda

22Kwafika iDili lokuZinikela eJerusalema. Kwakusebusika, 23uJesu esemagumeni ethempeli ezihambela eKhulusini likaSolomoni. 24AbaJuda babuthana kuye besithi, “Kuzaze kube nini ulokhu usithatha umhawu na? Nxa unguye uKhristu, sitshele kuhle.”

25UJesu waphendula wathi, “Ngalitshela, kodwa kalikholwa. Imimangaliso engiyenzayo ngebizo likaBaba iyangikhulumela, 26kodwa kalikholwa ngokuba kalisibo abomhlambi wami.

27Ezami izimvu ziyalilalela ilizwi lami; ngiyazazi lazo ziyangilandela. 28Ngizipha ukuphila okungapheliyo, kazisoze zabhubha; kakho ongazihlwitha esandleni sikaBaba. 29Ubaba ongiphe zona mkhulu kulakho konke, kakho ozangihlwitha esandleni sikaBaba 30Mina loBaba simunye.”

31Baphinda njalo abaJuda badobha amatshe ukuba bamkhande, 32kodwa uJesu wathi kubo, “Ngilitshengisile imimangaliso emikhulu eminengi evela kuBaba. Yiwuphi phakathi kwayo elingikhandela wona ngamatshe?”

33“Kasikukhandeli lakunye kwalokhu, kodwa sikukhandela ukuhlambaza, ngokuba wena, umuntu nje, uzitshaya uNkulunkulu.”

34UJesu waphendula wathi, “Kakulotshwanga yini eMthethweni wenu ukuthi, ‘Ngitshilo ukuthi lingonkulunkulu’?

35Nxa wababiza ngokuthi ‘ngonkulunkulu,’ bona labo ilizwi elafika kubo – njalo uMbhalo kawephulwa – 36pho-ke kungathiwani kulowo uBaba amkhethileyo ukuba ngowakhe wamthumela emhlabeni na? Kungani pho lingibeka icala lokuhlambaza ngoba ngithe ngiyiNdodana kaNkulunkulu? 37Lingaze langikholwa ngaphandle kokuba ngenze okwenziwa nguBaba. 38Kodwa uma ngikwenza, lanxa lingangikholwa, kholwani ubufakazi bemimangaliso, ukuze lifunde njalo lizwisise ukuthi uBaba ukimi, lami ngikuBaba.”

39Baphinda njalo bazama ukumbamba kodwa waphunyuka.

40UJesu wabuyela ngaphetsheya kwe-Jodani kuleyondawo lapho uJohane ayebhaphathizela khona ezinsukwini ezedlulayo. Wahlala khona,

41abantu abanengi beza kuye. Bathi, “Lanxa uJohane engazange enze ummangaliso, kodwa konke lokho uJohane akutshoyo ngomuntu lo kwakuliqiniso.” 42Kuleyondawo abanengi bakholwa kuJesu.